Kya Likhu

Kalam bechen hai likhne ko kuch,

Syah bhi abhi tak sukhi nahi hai.

Ye shabd mere yu is kadar ho jaye amar,

Aisa kuch likhne ki hasrat jagi hai,

Sochta hu chadhte suraj ki kirno pe likh du,

Kambakht saanjh dhalte hi ojhal si ho jati hai,

To socha dhalti sunahri sham per hi likh du,

Per andheri rat ke saye me to vo bhi so jati hai,

Sawan ki hariyali ke bare me socha hi tha bas,

Ki Patjhadh ke sookhe patte bechen ho udne lage,

Kalkal karti nadiyo ke bahav me bhi likhna chaha,

To sukhe ki trasdi me ye kamjor hath thakne lage,

Fir socha jivan me ayi un khushiyo per hi likh du,

Per bachpan se suna tha ye to pal bhar ki hi hoti hai,

Raeeso ki beshumar dualat per likhne ko kalam to uth gayi,

Lekin ye kale akshar likhne ko dil ki ijajat nahi hoti hai.

Fir achanak kisi ne ek muft ki salah de dali,

Agar sach me chahte ho jo likho vo amar ho jaye,

To Likho dukh aur chinta per, krodh aur irshya per,

Garibi aur lachari per, bhookhmari aur bimari per,

Socho mat Likh do in per, tum bhi amar ho jaoge.

Kaap gaye hath likhte likhte, kalam bhi chootke gir gayi

Aise amar shabdo se to mere kore kagaj hi acche hai,

Magar aaj bhi Kalam bechen hai likhne ko kuch,

Aur syah bhi abhi sukhi nahi hai.

Satya Ki Khoj

Us ghane andhiyare me, sustayi si raho me,

Chal pada akela yu hi, ek khwab liye nigaho me,

Sannato ke khalipan me aur madhyaratri ke yovan me,

Me satya khojne nikla tha, me satya khojne nikla tha.

Sawan ki khushhali se yu patjhar ke sukhe patto tak,

Chadhte suraj ki kirno se yu dhalti sham ki ahat tak,

Dharti ki hariyali se nile ambar ke vaibhav tak,

Me satya khojne nikla tha, me satya khojne nikla tha.

Navjat shishu ke rudan se shav per bhikre un ashru tak,

Muskan se khilte chehre se chinta me dube mukhdo tak,

Aur prem sudha ki varsha se irshya ki kali chaya tak,

Me satya khojne nikla tha, me satya khojne nikla tha.

Bheeshan tapti us garmi se yu sheetlahar ki thithuran tak.

Sadko per rote bhukho se vaibhavta ki us ronak tak.

Bachpan ki chanchalata se bebas lachar bhudhape tak.

Me satya khojne nikla tha, me satya khojne nikla tha.

Sahsa sannante me ek halki si ahat aayi,

Chand kadamo ke fasle per satya ki dhundhali jhalak payi.

Dang rah gaya pas pahuchkar, vishwas nahi kar paya me.

Vaha satya ki chadar odhke “ASATYA” bhraman per nikla tha.

Vyart yu na bhram karo , Satya hai kahi nahi.

Jo bhi hai vo main hi hu, asatya ne mujhse kahi.

Afsos hua ye sunkar mujhko, me galat rah per nikla tha.

Astitva nahi jiska jag me, usko kya kisi ne paya hai?

Aur main satya khojne nikla tha, me satya khojne nikla tha.